قصيدة (الوقت اللعوب) للشاعر/ عبدالله الاسيود العلياني
يا من تقول ويش الاحوال ماشين ينوب
دون قولي لك غثاء الحال شرن ودمره
مير انا صدري لمن سال عن حالي رحوب
لو ينث جروح قلبي ببيحه وعذره
فيا وجودي وجد من رضي بالقدر أمغصوب
اقتنع بالقدر قنعان و القدر أجبره
و اه لين أتفيح ويلاتها من كل صوب
و فيحةٍ تيبس حياء الغار ذا قدل مطره
حتى لو كان آه ما تشفي أجروح القلوب
مير ذي جدواي لاطاول الطرف أسهره
و اعتصم بالله ذا عنده الاجر أمحسوب
و احمده فيما حكم به و جله و شكره
فلاني الأول من الناس يالوقت اللعوب
يا كثر من طعن مثلي بصدره و ظهره
و لا بيدي حل في حكم عالم الغيوب
و لو بيدي حل ما فارق الموق أبصره
**
مجاراة الشاعر: سعد بن سفر بن مدشوش العلياني /
الصبر نعمه وحكمه على كل الدروب
والذي مومن بما يحكم الله ماكره
وطاعة الله فرض واجب علينا فالوجوب
والصبر غصن لرجلٍ صبر يجني اثمره
فيا وجودي وجد من هو على الامر امغلوب
قام من نومه وهو فاقدٍ شوف انظره
الله يرحمهم وذا قدر من ينشي النصوب
وذا طريقٍ للمخاليق حق وتعبره
والقدر يابو رعد ما عنه ينجي هروب
ومن فقدته عند رب السموات اذخره
واطلب من الله اللي ما يخيب المطلوب
يجعل لهم ظلمة القبر رحمه وسفره
والحرايب والكوارث معاناة الشعوب
كل يومٍ تدفن امواتها فالمقبره
والله ان صوبك على اهل الوفا والطيب صوب
قالها اللي ما عجز كل قافٍ يصخره
(
(
